mere sher mera ye rabta na gurez hai na tapak hai

mire she'r merā ye rābta na gurez hai na tapāk hai

hai hikāyat-e-dil-e-nā-rasā na gurez hai na tapāk hai

kabhī is tapāk kī justujū kabhī us gurez kī aarzū

yahī zindagī hai to marhabā na gurez hai na tapāk hai

kabhī zaḳhm-e-tāza kā ronā ro kabhī indimāl kā honā ho

mire 'arz-e-ġham tirī intihā na gurez hai na tapāk hai

kahīñ zauq-e-vasl ke mujra.ī kahīñ ranj-e-hijr ke nāla-zan

ye kise kahūñ mirā mudda'ā na gurez hai na tapāk hai

kabhī dil ko chhū ke guzar gayā kabhī lamha bhar ko Thahar gayā

mire harf-e-tāza kā mo'jiza na gurez hai na tapāk hai

na yahī ki sab se judā raho na yahī ki sab meñ sadā raho

ki vahī safar hai jo silsila na gurez hai na tapāk hai

mere she'r mera ye rabta na gurez hai na tapak hai

hai hikayat-e-dil-e-na-rasa na gurez hai na tapak hai

kabhi is tapak ki justuju kabhi us gurez ki aarzu

yahi zindagi hai to marhaba na gurez hai na tapak hai

kabhi zaKHm-e-taza ka rona ro kabhi indimal ka hona ho

mere 'arz-e-gham teri intiha na gurez hai na tapak hai

kahin zauq-e-wasl ke mujrai kahin ranj-e-hijr ke nala-zan

ye kise kahun mera mudda'a na gurez hai na tapak hai

kabhi dil ko chhu ke guzar gaya kabhi lamha bhar ko Thahar gaya

mere harf-e-taza ka mo'jiza na gurez hai na tapak hai

na yahi ki sab se juda raho na yahi ki sab mein sada raho

ki wahi safar hai jo silsila na gurez hai na tapak hai