justuju-e-nazar ki koi had bhi hai ab kahan aarzu-e-safar jaegi

justujū-e-nazar kī koī had bhī hai ab kahāñ ārzū-e-safar jā.egī

chāñd taare bhī gard-e-safar ho gaye ab junūñ kī savārī kidhar jā.egī

shabnamī raat Dhaltī hai Dhalne to do khil uThegā chaman rut badalne to do

sub.h-e-raushan kā sūraj nikalne to do har kalī phuul ban kar nikhar jā.egī

ai asīro uTho āh-o-nāla karo jor-e-sayyād kā kuchh to charchā karo

shor-e-tauq-o-salāsil hī barpā karo kuchh na kuchh to chaman tak ḳhabar jā.egī

mai-kade meñ bhī tafrīq hotī hai ab ik taraf bāda-kash ik taraf tishna-lab

sāqī-e-kam-nazar ab ḳhudā jaane kab tishna-kāmoñ pe terī nazar jā.egī

gesū-e-vaqt ham haiñ sañvāro hameñ ziist ke pech-o-ḳham haiñ sañvāro hameñ

paikar-e-ranj-o-ġham haiñ sañvāro hameñ ham jo sañvre to duniyā sañvar jā.egī

zulmat-e-shab se ai dil harāsāñ na ho taare gin gin ke nāhaq pareshāñ na ho

laakh bhārī sahī raat phir raat hai ḳhud guzarte guzarte guzar jā.egī

vo suḳhan kyā na ho jis meñ koī asar baat kyā jo na ho ḳhuub se ḳhūb-tar

'muztar'-e-kam-suḳhan Duub ke fikr kar terī har baat dil meñ utar jā.egī

justuju-e-nazar ki koi had bhi hai ab kahan aarzu-e-safar jaegi

chand tare bhi gard-e-safar ho gaye ab junun ki sawari kidhar jaegi

shabnami raat Dhalti hai Dhalne to do khil uThega chaman rut badalne to do

subh-e-raushan ka suraj nikalne to do har kali phul ban kar nikhar jaegi

ai asiro uTho aah-o-nala karo jor-e-sayyaad ka kuchh to charcha karo

shor-e-tauq-o-salasil hi barpa karo kuchh na kuchh to chaman tak KHabar jaegi

mai-kade mein bhi tafriq hoti hai ab ek taraf baada-kash ek taraf tishna-lab

saqi-e-kam-nazar ab KHuda jaane kab tishna-kaamon pe teri nazar jaegi

gesu-e-waqt hum hain sanwaro hamein zist ke pech-o-KHam hain sanwaro hamein

paikar-e-ranj-o-gham hain sanwaro hamein hum jo sanwre to duniya sanwar jaegi

zulmat-e-shab se ai dil harasan na ho tare gin gin ke nahaq pareshan na ho

lakh bhaari sahi raat phir raat hai KHud guzarte guzarte guzar jaegi

wo suKHan kya na ho jis mein koi asar baat kya jo na ho KHub se KHub-tar

'muztar'-e-kam-suKHan Dub ke fikr kar teri har baat dil mein utar jaegi