is darja haqiqat-ashna hun

is darja haqīqat-āshnā huuñ

afsāna-tarāz ban gayā huuñ

kis kis ne paḌhā magar na samjhā

maiñ aisā hī harf-e-mudda'ā huuñ

nafrat kī nazar se jo na dekhe

hairat se use maiñ dekhtā huuñ

maiñ sahl-pasand aadmī huuñ

likhtā vo nahīñ jo sochtā huuñ

maiñ chashm-e-hayāt kī mizha par

aañsū kī tarah rukā huā huuñ

phirtā huuñ chaman chaman magar maiñ

shabnam kī misāl Thertā huuñ

bāhar se huuñ ek tūda-e-barf

andar se magar sulag rahā huuñ

mere na qarīb se guzarnā

maiñ shāḳh-e-shajar huuñ TūTtā huuñ

har shaḳhs ko hai talāsh merī

har shaḳhs ko raah meñ milā huuñ

koī to mujhe mirī ḳhabar de

muddat se maiñ ḳhud se lāpatā huuñ

'tahsīn' kahāñ gaye haiñ sab log

maiñ raah meñ kyuuñ khaḌā huā huuñ

is darja haqiqat-ashna hun

afsana-taraaz ban gaya hun

kis kis ne paDha magar na samjha

main aisa hi harf-e-mudda'a hun

nafrat ki nazar se jo na dekhe

hairat se use main dekhta hun

main sahl-pasand aadmi hun

likhta wo nahin jo sochta hun

main chashm-e-hayat ki mizha par

aansu ki tarah ruka hua hun

phirta hun chaman chaman magar main

shabnam ki misal Therta hun

bahar se hun ek tuda-e-barf

andar se magar sulag raha hun

mere na qarib se guzarna

main shaKH-e-shajar hun TuTta hun

har shaKHs ko hai talash meri

har shaKHs ko rah mein mila hun

koi to mujhe meri KHabar de

muddat se main KHud se lapata hun

'tahsin' kahan gaye hain sab log

main rah mein kyun khaDa hua hun