ek diya bujhne se pahle raat bhaDka tha bahut

ik diyā bujhne se pahle raat bhaḌkā thā bahut

ḳhud fareboñ meñ hai lekin sub.h kā ġhauġhā bahut

āñdhiyāñ to tez thiiñ rabt-e-shajar kaam aa gayā

yuuñ to tanhā zard pattā peḌ par larzā bahut

de sakī ab tak na merī tīra-baḳhtī kā javāb

zindagī se har dahān-e-zaḳhm ne pūchhā bahut

yuuñ to thā terā tabassum ek saada sā fareb

aarzū kī sāda-lauhī ne use samjhā bahut

justujū-e-paikar-e-nā-āfrīda meñ kaTī

zindagī se ham ne kuchh paayā nahīñ khoyā bahut

ab koī abr-e-bahārāñ lā.iye sū-e-chaman

jalte haiñ phūloñ ke lab har pattā hai pyāsā bahut

mai-kashoñ ke lab hī jalte haiñ jigar jalte nahīñ

ho gayā hai sard shāyad sho’la-e-mīnā bahut

shukr hai do-chār āñkheñ ab to nam hone lagīñ

varna saarī zindagī royā huuñ maiñ tanhā bahut

go maiñ tanhā thā magar ehsās-e-tanhā.ī na thā

be-haqīqat saaya bhī raste meñ kaam aayā bahut

toḌ kar pheñko 'na.īmī' āgahī kā aa.ina

āgahī kā aa.ina bhī detā hai dhokā bahut

ek diya bujhne se pahle raat bhaDka tha bahut

KHud farebon mein hai lekin subh ka ghaugha bahut

aandhiyan to tez thin rabt-e-shajar kaam aa gaya

yun to tanha zard patta peD par larza bahut

de saki ab tak na meri tira-baKHti ka jawab

zindagi se har dahan-e-zaKHm ne puchha bahut

yun to tha tera tabassum ek sada sa fareb

aarzu ki sada-lauhi ne use samjha bahut

justuju-e-paikar-e-na-afrida mein kaTi

zindagi se hum ne kuchh paya nahin khoya bahut

ab koi abr-e-bahaaran laiye su-e-chaman

jalte hain phulon ke lab har patta hai pyasa bahut

mai-kashon ke lab hi jalte hain jigar jalte nahin

ho gaya hai sard shayad sho’la-e-mina bahut

shukr hai do-chaar aankhen ab to nam hone lagin

warna sari zindagi roya hun main tanha bahut

go main tanha tha magar ehsas-e-tanhai na tha

be-haqiqat saya bhi raste mein kaam aaya bahut

toD kar phenko 'naimi' aagahi ka aaina

aagahi ka aaina bhi deta hai dhoka bahut