apna jise samajhta tha wo bhi mera na tha

apnā jise samajhtā thā vo bhī mirā na thā

ye aisā hādsa thā jo dekhā sunā na thā

kitnī shadīd dhuup hai ehsās ab huā

thā sar pe sā.ebān to kuchh bhī pata na thā

vallāh husn-e-shauq ki maktūb-e-yār meñ

vo bhī paḌhā hai maiñ ne jo us ne likhā na thā

mauzū'-e-ġham pe kartā thā din raat guftugū

vo shaḳhs jis kā ġham se koī vāsta na thā

tūfāñ kā siina chiir ke sāhil pe aa ga.iiñ

vo kashtiyāñ bhī jin kā koī nā-ḳhudā na thā

din raat jin ko paane kī karte the justujū

vo mil ga.e to ham ko hamārā pata na thā

maqbūl kaise hotīñ ye rasmī 'ibādateñ

sar hī jhukā thā sajde meñ dil to jhukā na thā

apna jise samajhta tha wo bhi mera na tha

ye aisa hadsa tha jo dekha suna na tha

kitni shadid dhup hai ehsas ab hua

tha sar pe saeban to kuchh bhi pata na tha

wallah husn-e-shauq ki maktub-e-yar mein

wo bhi paDha hai main ne jo us ne likha na tha

mauzu'-e-gham pe karta tha din raat guftugu

wo shaKHs jis ka gham se koi wasta na tha

tufan ka sina chir ke sahil pe aa gain

wo kashtiyan bhi jin ka koi na-KHuda na tha

din raat jin ko pane ki karte the justuju

wo mil gae to hum ko hamara pata na tha

maqbul kaise hotin ye rasmi 'ibaadaten

sar hi jhuka tha sajde mein dil to jhuka na tha