jurm-e-izhaar-e-tamanna aankh ke sar aa gaya

jurm-e-iz.hār-e-tamannā aañkh ke sar aa gayā

chor jo dil meñ chhupā thā aaj bāhar aa gayā

mere lafzoñ meñ harārat mere lahje meñ miThās

jo kuchh in āñkhoñ meñ thā mere laboñ par aa gayā

jin kī tābīroñ meñ thī ik umr kī vāraftagī

phir nigāhoñ meñ unhīñ ḳhvāboñ kā manzar aa gayā

shahr ke ābād sannāToñ kī vahshat dekh kar

dil ko jaane kyā huā maiñ shaam se ghar aa gayā

pahle chādar kī havas meñ paañv phailā.e bahut

ab ye dukh hai paañv kyuuñ chādar se bāhar aa gayā

ham divānoñ ke liye thiiñ vus.ateñ hī vus.ateñ

ḳhatm jab sahrā huā aage samundar aa gayā

tum ne 'bāqar' dil kā darvāza khulā rakkhā thā kyuuñ

jis ko aanā thā vo āḳhir dard ban kar aa gayā

jurm-e-izhaar-e-tamanna aankh ke sar aa gaya

chor jo dil mein chhupa tha aaj bahar aa gaya

mere lafzon mein hararat mere lahje mein miThas

jo kuchh in aankhon mein tha mere labon par aa gaya

jin ki tabiron mein thi ek umr ki waraftagi

phir nigahon mein unhin KHwabon ka manzar aa gaya

shahr ke aabaad sannaTon ki wahshat dekh kar

dil ko jaane kya hua main sham se ghar aa gaya

pahle chadar ki hawas mein panw phailae bahut

ab ye dukh hai panw kyun chadar se bahar aa gaya

hum diwanon ke liye thin wusaten hi wusaten

KHatm jab sahra hua aage samundar aa gaya

tum ne 'baqar' dil ka darwaza khula rakkha tha kyun

jis ko aana tha wo aaKHir dard ban kar aa gaya