jurat-e-izhaar se rokegi kya

jur.at-e-iz.hār se rokegī kyā

maslahat merā qalam chhīnegī kyā

maiñ musāfir din kī jaltī dhuup kā

raat merā dard pahchānegī kyā

be-karāñ huuñ maiñ samundar kī tarah

mauj-e-shabnam qad mirā nāpegī kyā

chal paḌā huuñ sar pe le kar āsmāñ

paañv ke nīche zamīñ Thahregī kyā

shahr-e-gul kī rahne vaalī āgahī

mire zaḳhmoñ kī zabāñ samjhegī kyā

chehrā chehrā ālm-e-be-chehragī

dekh kar bhī zindagī dekhegī kyā

maiñ to logo sah luuñ har patthar kā jabr

vaqt kī shīshagarī sochegī kyā

hasratoñ kī aañch meñ is ko tapā

yuuñ badan kī tīrgī pighlegī kyā

nutq se lab tak hai sadiyoñ kā safar

ḳhāmushī ye dukh bhalā jhelegī kyā

kyā tavaqqo kor-zehnoñ se 'fazā'

ko.eloñ se raushnī phūTegī kyā

jurat-e-izhaar se rokegi kya

maslahat mera qalam chhinegi kya

main musafir din ki jalti dhup ka

raat mera dard pahchanegi kya

be-karan hun main samundar ki tarah

mauj-e-shabnam qad mera napegi kya

chal paDa hun sar pe le kar aasman

panw ke niche zamin Thahregi kya

shahr-e-gul ki rahne wali aagahi

mere zaKHmon ki zaban samjhegi kya

chehra chehra aalm-e-be-chehragi

dekh kar bhi zindagi dekhegi kya

main to logo sah lun har patthar ka jabr

waqt ki shishagari sochegi kya

hasraton ki aanch mein is ko tapa

yun badan ki tirgi pighlegi kya

nutq se lab tak hai sadiyon ka safar

KHamushi ye dukh bhala jhelegi kya

kya tawaqqo kor-zehnon se 'faza'

koelon se raushni phuTegi kya