KHuda ke samne keh den buton ko pyar kiya

ḳhudā ke sāmne keh deñ butoñ ko pyaar kiyā

ye jurm ham ne kiyā aur laakh baar kiyā

vo ḳhush rahe jo hameñ ranj de mohabbat meñ

vo barqarār rahe jis ne be-qarār kiyā

tumhārā jhuuT bhī achchhā hai tum bhī achchhe ho

bure to ham haiñ ki jhūTe kā e'tibār kiyā

ye kam-sinī kā asar thā ki aaj qātil ne

jhijak jhijak ke baḌī mushkiloñ se vaar kiyā

junūñ meñ aur ye vahshī-mizāj kyā karte

yahī kiyā ki garebāñ ko taar taar kiyā

ye kyā ḳhatā hai ki maiñ dil-dahī ko kahtā huuñ

baḌā gunāh to vo thā ki dil nisār kiyā

bhale ko ab ye samajh aa ga.ī tumheñ ki 'qamar'

bure ko dost banāyā bure ko pyaar kiyā

KHuda ke samne keh den buton ko pyar kiya

ye jurm hum ne kiya aur lakh bar kiya

wo KHush rahe jo hamein ranj de mohabbat mein

wo barqarar rahe jis ne be-qarar kiya

tumhaara jhuT bhi achchha hai tum bhi achchhe ho

bure to hum hain ki jhuTe ka e'tibar kiya

ye kam-sini ka asar tha ki aaj qatil ne

jhijak jhijak ke baDi mushkilon se war kiya

junun mein aur ye wahshi-mizaj kya karte

yahi kiya ki gareban ko tar tar kiya

ye kya KHata hai ki main dil-dahi ko kahta hun

baDa gunah to wo tha ki dil nisar kiya

bhale ko ab ye samajh aa gai tumhein ki 'qamar'

bure ko dost banaya bure ko pyar kiya