junun walon se hargiz dasht-paimai na jaegi

junūñ vāloñ se hargiz dasht-paimā.ī na jā.egī

hazāroñ shahr rakh do in kī tanhā.ī na jā.egī

hamesha pyaar kā bādal hī ban kar maiñ to barsā huuñ

fazā jo bhī ho mujh se aag barsā.ī na jā.egī

tumheñ jaanā hai jaao toḌ do sab pyaar ke rishte

tumhāre saath to is ghar kī añgnā.ī na jā.egī

parindoñ ko fazā meñ rok leñge rokne vaale

‘uqāboñ ko magar zanjīr pahnā.ī na jā.egī

maiñ bosa ret kā le kar huā huuñ phir tar-o-tāza

mire chehre se hargiz ab ye rā'nā.ī na jā.egī

are vīrāniyo jaao Thikānā aur hī DhūñDo

ye vo āñkheñ haiñ jin kī ḳhvāb-ārā.ī na jā.egī

kisī kī yaad kī hai chāñdnī chhiTkī huī ghar meñ

jhaTak do laakh zehnoñ se ye harjā.ī na jā.egī

junun walon se hargiz dasht-paimai na jaegi

hazaron shahr rakh do in ki tanhai na jaegi

hamesha pyar ka baadal hi ban kar main to barsa hun

faza jo bhi ho mujh se aag barsai na jaegi

tumhein jaana hai jao toD do sab pyar ke rishte

tumhaare sath to is ghar ki angnai na jaegi

parindon ko faza mein rok lenge rokne wale

‘uqabon ko magar zanjir pahnai na jaegi

main bosa ret ka le kar hua hun phir tar-o-taza

mere chehre se hargiz ab ye ra'nai na jaegi

are viraniyo jao Thikana aur hi DhunDo

ye wo aankhen hain jin ki KHwab-arai na jaegi

kisi ki yaad ki hai chandni chhiTki hui ghar mein

jhaTak do lakh zehnon se ye harjai na jaegi