josh-e-junun mein farq na aaya kuchh bhi garmi sardi se

josh-e-junūñ meñ farq na aayā kuchh bhī garmī sardī se

dil meñ zaḳhm ke phuul khile ḳhurdād meñ bhī farvardī se

ik husn-e-bīmār ke ġham meñ jī ko rog lagā baiThe

'ishq-o-junūñ tak aa pahuñchī jo baat chalī hamdardī se

masjid maktab dair-o-haram kyā chhūT ga.e ghar-bār se bhī

jab se huā hai dil kā ta'alluq 'ishq kī kūcha-gardī se

purze purze jāma-e-jāñ hai TukḌe TukḌe dāman-e-dil

Thukrāyā iḳhlās ko mere aap ne kis bedardī se

ham apne maazī se kyūñ-kar tark-e-ta'alluq kar lete

hotā hai har tarh tasalsul har fardā ko har dī se

'ishq chhupā.e kab chhuptā hai laakh tabassum-rez raheñ

rang-e-mohabbat jhalak rahā hai ruḳhsāroñ kī zardī se

ye dīn-o-duniyā ke havādis 'ishq-o-vafā ke ye sadme

kitne ġhamoñ se Takkar lī hai 'tābāñ' ne pā-mardī se

josh-e-junun mein farq na aaya kuchh bhi garmi sardi se

dil mein zaKHm ke phul khile KHurdad mein bhi farwardi se

ek husn-e-bimar ke gham mein ji ko rog laga baiThe

'ishq-o-junun tak aa pahunchi jo baat chali hamdardi se

masjid maktab dair-o-haram kya chhuT gae ghar-bar se bhi

jab se hua hai dil ka ta'alluq 'ishq ki kucha-gardi se

purze purze jama-e-jaan hai TukDe TukDe daman-e-dil

Thukraya iKHlas ko mere aap ne kis bedardi se

hum apne mazi se kyun-kar tark-e-ta'alluq kar lete

hota hai har tarh tasalsul har farda ko har di se

'ishq chhupae kab chhupta hai lakh tabassum-rez rahen

rang-e-mohabbat jhalak raha hai ruKHsaron ki zardi se

ye din-o-duniya ke hawadis 'ishq-o-wafa ke ye sadme

kitne ghamon se Takkar li hai 'taban' ne pa-mardi se