jis jagah tak tere qadmon ke nishan jaenge

jis jagah tak tire qadmoñ ke nishāñ jā.eñge

tere dīvāne vahāñ sajda-kunāñ jā.eñge

ḳhvāh karte hue fariyād-o-fuġhāñ jā.eñge

terī dargāh se nikle to kahāñ jā.eñge

ham ne taklīf chhupāne kī riyāzat kī hai

muskurāte hue jā.eñge jahāñ jā.eñge

haram-e-shaiḳh meñ kuchh kaam nahīñ rindoñ kā

saaf zāhir hai ki phir sū-e-butāñ jā.eñge

koī me'yār kā maqtal to sajāyā jaa.e

ham chaḌhāte hue nazrāna-e-jāñ jā.eñge

tere jalvoñ kī tab-o-tāb agar dekh sakeñ

raqs karte hue sab pīr-o-javāñ jā.eñge

bazm-e-jānāñ meñ na jaane kī qasam de na 'sahar'

ham to ye Thaan ke baiThe haiñ ki haañ jā.eñge

jis jagah tak tere qadmon ke nishan jaenge

tere diwane wahan sajda-kunan jaenge

KHwah karte hue fariyaad-o-fughan jaenge

teri dargah se nikle to kahan jaenge

hum ne taklif chhupane ki riyazat ki hai

muskuraate hue jaenge jahan jaenge

haram-e-shaiKH mein kuchh kaam nahin rindon ka

saf zahir hai ki phir su-e-butan jaenge

koi me'yar ka maqtal to sajaya jae

hum chaDhate hue nazrana-e-jaan jaenge

tere jalwon ki tab-o-tab agar dekh saken

raqs karte hue sab pir-o-jawan jaenge

bazm-e-jaanan mein na jaane ki qasam de na 'sahar'

hum to ye Than ke baiThe hain ki han jaenge