chhoD den saqi agar tere hi mai-KHane ko hum

chhoḌ deñ saaqī agar tere hī mai-ḳhāne ko ham

aur kis ke dar pe jaa.eñ haath phailāne ko ham

kab tak āñkhoñ se bahā.e jaa.eñ yuuñ dil kā lahū

ab koī rang aur deñge apne afsāne ko ham

kis qadar badlā huā hai ab nizām-e-mai-kada

is se pahle chhū nahīñ sakte the paimāne ko ham

ek hī shauq-o-talab kā rang hai donoñ taraf

jān-e-mahfil sham' ko samjheñ ki parvāne ko ham

phir huī bedār dil meñ lazzat-e-zauq-e-ḳhalish

phir chale dāman unhīñ kāñToñ meñ uljhāne ko ham

tishnagī le aatī hai ab aisī manzil par hameñ

bas chale to chhīn leñ saaqī se paimāne ko ham

log apnoñ se bhī milte haiñ to kyā be-gāna-vār

kaisā kaisā chāhte haiñ ek be-gāne ko ham

vo nigāh-e-mast bhī hai daur-e-paimāna bhī hai

ab nigāh-e-mast ko dekheñ ki paimāne ko ham

hai junūn-e-ābla-pā.ī yahī 'iqbāl' agar

rafta rafta gulsitāñ kar deñge vīrāne ko ham

chhoD den saqi agar tere hi mai-KHane ko hum

aur kis ke dar pe jaen hath phailane ko hum

kab tak aankhon se bahae jaen yun dil ka lahu

ab koi rang aur denge apne afsane ko hum

kis qadar badla hua hai ab nizam-e-mai-kada

is se pahle chhu nahin sakte the paimane ko hum

ek hi shauq-o-talab ka rang hai donon taraf

jaan-e-mahfil sham' ko samjhen ki parwane ko hum

phir hui bedar dil mein lazzat-e-zauq-e-KHalish

phir chale daman unhin kanTon mein uljhane ko hum

tishnagi le aati hai ab aisi manzil par hamein

bas chale to chhin len saqi se paimane ko hum

log apnon se bhi milte hain to kya be-gana-war

kaisa kaisa chahte hain ek be-gane ko hum

wo nigah-e-mast bhi hai daur-e-paimana bhi hai

ab nigah-e-mast ko dekhen ki paimane ko hum

hai junun-e-abla-pai yahi 'iqbaal' agar

rafta rafta gulsitan kar denge virane ko hum