zinda rahte bhi hain ya aise hi mar jate hain

zinda rahte bhī haiñ yā aise hī mar jaate haiñ

tere Thukrā.e hue log kidhar jaate haiñ

vāpsī kī koī ummīd na rakhnā un se

vo jo ehsās ke lāshe se guzar jaate haiñ

zindagī tū ne Thikāne pe lagā rakkhā hai

terī Thokar se hī ham log sudhar jaate haiñ

yuuñ to qudrat ne banāyā hai unheñ Dher hasīñ

dekh leñ ham to vo kuchh aur sañvar jaate haiñ

ham hue jaate haiñ maa.il yuuñ tumhārī jānib

tum ko khone ke tasavvur se bhī Dar jaate haiñ

un kī aamad kī ḳhushī hai to udāsī bhī hai

vasl ke lamhe bahut tez guzar jaate haiñ

dil kī duniyā meñ udāsī ke sivā kuchh bhī nahīñ

raat hotī hai to ausān bikhar jaate haiñ

kitne kam-zarf haiñ 'almās' zamāne vaale

aa ke manzil pe mohabbat se mukar jaate haiñ

zinda rahte bhi hain ya aise hi mar jate hain

tere Thukrae hue log kidhar jate hain

wapsi ki koi ummid na rakhna un se

wo jo ehsas ke lashe se guzar jate hain

zindagi tu ne Thikane pe laga rakkha hai

teri Thokar se hi hum log sudhar jate hain

yun to qudrat ne banaya hai unhen Dher hasin

dekh len hum to wo kuchh aur sanwar jate hain

hum hue jate hain mail yun tumhaari jaanib

tum ko khone ke tasawwur se bhi Dar jate hain

un ki aamad ki KHushi hai to udasi bhi hai

wasl ke lamhe bahut tez guzar jate hain

dil ki duniya mein udasi ke siwa kuchh bhi nahin

raat hoti hai to ausan bikhar jate hain

kitne kam-zarf hain 'almas' zamane wale

aa ke manzil pe mohabbat se mukar jate hain