ye fard-e-jurm hai mujh par ki us se pyar karta hun

ye fard-e-jurm hai mujh par ki us se pyaar kartā huuñ

maiñ is ilzām se filhāl to inkār kartā huuñ

jhaTak detā hai ḳhvāb-e-vasl kā har rang āñkhoñ se

ye koshish kyā kahūñ har roz kitnī baar kartā huuñ

sabhī hairān haiñ kyā thā vo samjhauta judā.ī kā

na vo e'lān kartā hai na maiñ iz.hār kartā huuñ

mirī āñkhoñ meñ phir jaatī hai sūrat hū-ba-hū us kī

maiñ us ke dekhne vāloñ kā jab dīdār kartā huuñ

'ajab kyā hai agar ghāTā paḌā mujh ko mohabbat meñ

ye kār-o-bār hai aur meñ ye kār-o-bār kartā huuñ

'zafar' tasvīr ho saktī hai kab ne'mul-badal us kā

koī pūchhe ye maiñ kis chiiz par isrār kartā huuñ

ye fard-e-jurm hai mujh par ki us se pyar karta hun

main is ilzam se filhaal to inkar karta hun

jhaTak deta hai KHwab-e-wasl ka har rang aankhon se

ye koshish kya kahun har roz kitni bar karta hun

sabhi hairan hain kya tha wo samjhauta judai ka

na wo e'lan karta hai na main izhaar karta hun

meri aankhon mein phir jati hai surat hu-ba-hu us ki

main us ke dekhne walon ka jab didar karta hun

'ajab kya hai agar ghaTa paDa mujh ko mohabbat mein

ye kar-o-bar hai aur mein ye kar-o-bar karta hun

'zafar' taswir ho sakti hai kab ne'mul-badal us ka

koi puchhe ye main kis chiz par israr karta hun