wo sham jo bal khai wo ek nazara tha
vo sham' jo bal khaa.ī vo ek nazāra thā
jo TuuT ke bikhrā hai vo ḳhvāb hamārā thā
us phuul kī ḳhushbū ko kis tarh bhulā.ūñ maiñ
sāñsoñ meñ basāyā thā lafzoñ meñ utārā thā
har ek kiran dil par bijlī sī girātī thī
ik chāñd ke pahlū meñ dariyā kā kinārā thā
yūñhī nahīñ hilte haiñ shāḳhoñ pe hare patte
zulfoñ kā jhaTaknā bhī qurbat kā ishārā thā
duniyā ne na jaane kyuuñ donoñ ko alag rakkhā
lailā bhī kuñvārī thī majnūñ bhī kuñvārā thā
us paar utarne kī kartā maiñ sa'ī kaise
dariyā meñ talātum thā kashtī meñ sharāra thā
sab haath meñ tere hai jo chāhe 'atā kar de
jiinā bhī gavārā thā marnā bhī gavārā thā
har ḳhaar ko chūmā hai palkoñ se uThāyā hai
'nūrain' mohabbat meñ dāman bhī pasārā thā
wo sham' jo bal khai wo ek nazara tha
jo TuT ke bikhra hai wo KHwab hamara tha
us phul ki KHushbu ko kis tarh bhulaun main
sanson mein basaya tha lafzon mein utara tha
har ek kiran dil par bijli si giraati thi
ek chand ke pahlu mein dariya ka kinara tha
yunhi nahin hilte hain shaKHon pe hare patte
zulfon ka jhaTakna bhi qurbat ka ishaara tha
duniya ne na jaane kyun donon ko alag rakkha
laila bhi kunwari thi majnun bhi kunwara tha
us par utarne ki karta main sa'i kaise
dariya mein talatum tha kashti mein sharara tha
sab hath mein tere hai jo chahe 'ata kar de
jina bhi gawara tha marna bhi gawara tha
har KHar ko chuma hai palkon se uThaya hai
'nurain' mohabbat mein daman bhi pasara tha
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
