kyun tujhe Dar hai ki maut aai to mar jaungi

kyuuñ tujhe Dar hai ki maut aa.ī to mar jā.ūñgī

maiñ to 'nik.hat' huuñ fazāoñ meñ bikhar jā.ūñgī

saarī duniyā se kaTī huuñ tujhe paane ke liye

tū ne Thukrā diyā mujh ko to kidhar jā.ūñgī

tū mire hāl-e-pareshāñ se pareshān na ho

lams pā kar tirī ḳhushbū kā nikhar jā.ūñgī

phone par pūchhegā kaisī ho to keh dūñgī ki ḳhush

maiñ faqat us kī tasallī ko mukar jā.ūñgī

maiñ koī chāñd nahīñ huuñ ki chhupā luuñ chehra

maiñ huuñ ham-rāhī-e-shab tā-ba-sahar jā.ūñgī

vā'da-e-tark-e-ta'alluq ko karūñgī iifā

tire ḳhvāboñ se dabe paaoñ guzar jā.ūñgī

kyun tujhe Dar hai ki maut aai to mar jaungi

main to 'nikhat' hun fazaon mein bikhar jaungi

sari duniya se kaTi hun tujhe pane ke liye

tu ne Thukra diya mujh ko to kidhar jaungi

tu mere haal-e-pareshan se pareshan na ho

lams pa kar teri KHushbu ka nikhar jaungi

phone par puchhega kaisi ho to keh dungi ki KHush

main faqat us ki tasalli ko mukar jaungi

main koi chand nahin hun ki chhupa lun chehra

main hun ham-rahi-e-shab ta-ba-sahar jaungi

wa'da-e-tark-e-ta'alluq ko karungi ifa

tere KHwabon se dabe paon guzar jaungi