chahe ek pal ka sahi sath gawara kar lo

chāhe ik pal kā sahī saath gavārā kar lo

phir koī ġham nahīñ gar ham se kinārā kar lo

merā hissa hai mohabbat to adā naqd karo

gar nahīñ bas meñ to nafrat hī ḳhudā-rā kar lo

kaun kahtā hai ki lāzim inheñ tā'bīr bhī do

mere ḳhvāboñ ko bas āñkhoñ meñ gavārā kar lo

gar nahīñ aur vajah koī shanāsā.ī kī

ik mohabbat hai vahī phir se dubārā kar lo

phir kahāñ aur kisī kā vo kabhī ho paayā

jis pe ik baar yahāñ tum jo ijārā kar lo

maanā mushkil hai mirā tum se bichhaḌ kar jiinā

saath meñ to huuñ tire tum to guzārā kar lo

dam nikal jā.egā yuuñ hī mirā hañste hañste

ik nazar merī taraf hañs ke ishārā kar lo

ham nahīñ vo ki jo le jā.eñge manzil kī taraf

yahī behtar hai koī aur sitārā kar lo

ek hī shaḳhs kī chāhat meñ bhalā kyā marnā

bevafā.ī ko hī jiine kā sahārā kar lo

jab kabhī bāñdhā hai 'abrak' ne yahāñ raḳht-e-safar

dil machaltā hai zarā aur nazāra kar lo

chahe ek pal ka sahi sath gawara kar lo

phir koi gham nahin gar hum se kinara kar lo

mera hissa hai mohabbat to ada naqd karo

gar nahin bas mein to nafrat hi KHuda-ra kar lo

kaun kahta hai ki lazim inhen ta'bir bhi do

mere KHwabon ko bas aankhon mein gawara kar lo

gar nahin aur wajah koi shanasai ki

ek mohabbat hai wahi phir se dubara kar lo

phir kahan aur kisi ka wo kabhi ho paya

jis pe ek bar yahan tum jo ijara kar lo

mana mushkil hai mera tum se bichhaD kar jina

sath mein to hun tere tum to guzara kar lo

dam nikal jaega yun hi mera hanste hanste

ek nazar meri taraf hans ke ishaara kar lo

hum nahin wo ki jo le jaenge manzil ki taraf

yahi behtar hai koi aur sitara kar lo

ek hi shaKHs ki chahat mein bhala kya marna

bewafai ko hi jine ka sahaara kar lo

jab kabhi bandha hai 'abrak' ne yahan raKHt-e-safar

dil machalta hai zara aur nazara kar lo