be-sabab hone lagi jag mein hansai meri

be-sabab hone lagī jag meñ hañsā.ī merī

kaam aa.ī na mire haq meñ safā.ī merī

āshnā ho ke bhī anjān bane phirte haiñ

bhuul jaate haiñ sab ik pal meñ bhalā.ī merī

mujhe mā'lūm hai maiñ ġhair zarūrī sī huuñ

raas aa.egī yahāñ sab ko judā.ī merī

zahr sābit huā vo mere liye jaane kyuuñ

maiñ samajhtī thī use vo hai davā.ī merī

apne pyāroñ ko maiñ kar saktī nahīñ sharminda

is liye bach ga.ī kaTne se kalā.ī merī

airoñ-ġhairoñ ne to aksar hī sarāhā hai mujhe

mere mohsin hī kareñ ab to burā.ī merī

dhoke dete haiñ mujhe vo jo vafā ke badle

aise hī logoñ talak hogī rasā.ī merī

zaḳhm siine ke ubhar aa.e haiñ ruḳh par mere

us ne kyā soch ke tasvīr banā.ī merī

be-sabab hone lagi jag mein hansai meri

kaam aai na mere haq mein safai meri

aashna ho ke bhi anjaan bane phirte hain

bhul jate hain sab ek pal mein bhalai meri

mujhe ma'lum hai main ghair zaruri si hun

ras aaegi yahan sab ko judai meri

zahr sabit hua wo mere liye jaane kyun

main samajhti thi use wo hai dawai meri

apne pyaron ko main kar sakti nahin sharminda

is liye bach gai kaTne se kalai meri

airon-ghairon ne to aksar hi saraha hai mujhe

mere mohsin hi karen ab to burai meri

dhoke dete hain mujhe wo jo wafa ke badle

aise hi logon talak hogi rasai meri

zaKHm sine ke ubhar aae hain ruKH par mere

us ne kya soch ke taswir banai meri