جو تیرے ساتھ ذرا دیر تک رکا ہوتا

جو تیرے ساتھ ذرا دیر تک رکا ہوتا

میں اک خیال سے آگے نہیں گیا ہوتا

فقیر لوگ رہے اپنے اپنے حال میں مست

نہیں تو شہر کا نقشہ بدل چکا ہوتا

میں اپنے دل سے مخاطب تھا تاجروں سے نہیں

کہ ناپ تول کے سب کچھ کہا سنا ہوتا

وہ بادشاہ محبت میں ہار بھی جاتے

تو سلطنت کا بڑا کام ہو گیا ہوتا

کوئی تو جاگ گیا ہوتا باغ جلنے تک

مری صدا سے کسی کا بھلا ہوا ہوتا

ہم ایسے لوگ تو اکتا گئے تھے عشق سے بھی

وہ بے وفا نہیں ہوتا تو جانے کیا ہوتا

بھلا ہوا کہ جدا ہو گیا وہ جادوگر

میں بند آنکھیں لئے ساتھ چل رہا ہوتا