jo mujhko dekh ke kal raat ro paDa tha bahut

jo mujh ko dekh ke kal raat ro paḌā thā bahut

vo merā kuchh bhī na thā phir bhī āshnā thā bahut

maiñ ab bhī raat ga.e us kī guuñj suntā huuñ

vo harf kam thā bahut kam magar sadā thā bahut

zamīñ ke siine meñ sūraj kahāñ se utre haiñ

falak pe duur koī baiThā sochtā thā bahut

mujhe jo dekhā to kāġhaz ko purze purze kiyā

vo apnī shakl ke ḳhāke banā rahā thā bahut

maiñ apne haath se niklā to phir kahīñ na milā

zamāna mere ta.āqub meñ bhī gayā thā bahut

shikast-o-reḳht badan kī ab apne bas meñ nahīñ

use batā.ūñ ki vo ramz-āshnā thā bahut

bisāt us ne ulaT dī na jaane soch ke kyā

abhī to logoñ meñ jiine kā hauslā thā bahut

ajab sharīk-e-safar thā ki jab paḌāv kiyā

vo mere paas na Thahrā magar rukā thā bahut

sehr ke chāk-e-garebāñ ko dekhne ke liye

vo shaḳhs sub.h talak shab ko jāgtā thā bahut

vo kam-suḳhan thā magar aisā kam-suḳhan bhī na thā

ki sach hī boltā thā jab bhī boltā thā bahut

havā ke lams se chehre pe phuul khilte the

vo chāñdnī sā badan mauja-e-sabā thā bahut

pas-e-darīcha do āñkheñ chamaktī rahtī thiiñ

ki us ko niiñd meñ chalne kā āriza thā bahut

kahāniyoñ kī fazā bhī use thī raas 'aḳhtar'

haqīqatoñ se bhī ohda-bar-ā huā thā bahut

jo mujh ko dekh ke kal raat ro paDa tha bahut

wo mera kuchh bhi na tha phir bhi aashna tha bahut

main ab bhi raat gae us ki gunj sunta hun

wo harf kam tha bahut kam magar sada tha bahut

zamin ke sine mein suraj kahan se utre hain

falak pe dur koi baiTha sochta tha bahut

mujhe jo dekha to kaghaz ko purze purze kiya

wo apni shakl ke KHake bana raha tha bahut

main apne hath se nikla to phir kahin na mila

zamana mere taaqub mein bhi gaya tha bahut

shikast-o-reKHt badan ki ab apne bas mein nahin

use bataun ki wo ramz-ashna tha bahut

bisat us ne ulaT di na jaane soch ke kya

abhi to logon mein jine ka hausla tha bahut

ajab sharik-e-safar tha ki jab paDaw kiya

wo mere pas na Thahra magar ruka tha bahut

sehr ke chaak-e-gareban ko dekhne ke liye

wo shaKHs subh talak shab ko jagta tha bahut

wo kam-suKHan tha magar aisa kam-suKHan bhi na tha

ki sach hi bolta tha jab bhi bolta tha bahut

hawa ke lams se chehre pe phul khilte the

wo chandni sa badan mauja-e-saba tha bahut

pas-e-daricha do aankhen chamakti rahti thin

ki us ko nind mein chalne ka aariza tha bahut

kahaniyon ki faza bhi use thi ras 'aKHtar'

haqiqaton se bhi ohda-bar-a hua tha bahut