jo apni KHwahishon mein tu ne kuchh kami kar li

jo apnī ḳhvāhishoñ meñ tū ne kuchh kamī kar lī

to phir ye jaan ki tū ne payambarī kar lī

tujhe maiñ zindagī apnī samajh rahā thā magar

tire baġhair basar maiñ ne zindagī kar lī

pahuñch gayā huuñ maiñ manzil pe gardish-e-daurāñ

Thahar bhī jā ki bahut tū ne rahbarī kar lī

jo mere gaañv ke khetoñ meñ bhuuk ugne lagī

mire kisānoñ ne shahroñ meñ naukrī kar lī

jo sachchī baat thī vo maiñ ne barmalā kah dī

yuuñ apne dostoñ se maiñ ne dushmanī kar lī

mashīnī ahd meñ ehsās-e-zindagī ban kar

dukhī diloñ ke liye maiñ ne shā.erī kar lī

ġharīb-e-shahr to faaqe se mar gayā 'ārif'

amīr-e-shahr ne hiire se ḳhud-kushī kar lī

jo apni KHwahishon mein tu ne kuchh kami kar li

to phir ye jaan ki tu ne payambari kar li

tujhe main zindagi apni samajh raha tha magar

tere baghair basar main ne zindagi kar li

pahunch gaya hun main manzil pe gardish-e-dauran

Thahar bhi ja ki bahut tu ne rahbari kar li

jo mere ganw ke kheton mein bhuk ugne lagi

mere kisanon ne shahron mein naukri kar li

jo sachchi baat thi wo main ne barmala kah di

yun apne doston se main ne dushmani kar li

mashini ahd mein ehsas-e-zindagi ban kar

dukhi dilon ke liye main ne shaeri kar li

gharib-e-shahr to faqe se mar gaya 'arif'

amir-e-shahr ne hire se KHud-kushi kar li