ji se mujhe chah hai kisi ki

jī se mujhe chaah hai kisī kī

kyā jaane koī kisī kī jī kī

shāhid rahiyo tū ai shab-e-hijr

jhapkī nahīñ aañkh 'mus.hafī' kī

rone pe mire jo tum hañso ho

ye kaun sī baat hai hañsī kī

juuñ juuñ ki banāv par vo aayā

duunī huī chaah ārasī kī

go ab vo javāñ nahīñ pa ham se

lat jaa.e hai koī āshiqī kī

chāhe to shafaq ko phūñk deve

surḳhī tire rañg-e-ātishī kī

maiñ vādi-e-ishq meñ jo aayā

majnūñ ne mirī na ham-sarī kī

khāte nahīñ ab tire nusairī

saugand bhī murtazā-alī kī

kyā reḳhta kam hai 'mus.hafī' kā

bū aatī hai is meñ fārsī kī

ji se mujhe chah hai kisi ki

kya jaane koi kisi ki ji ki

shahid rahiyo tu ai shab-e-hijr

jhapki nahin aankh 'mushafi' ki

rone pe mere jo tum hanso ho

ye kaun si baat hai hansi ki

jun jun ki banaw par wo aaya

duni hui chah aarasi ki

go ab wo jawan nahin pa hum se

lat jae hai koi aashiqi ki

chahe to shafaq ko phunk dewe

surKHi tere rang-e-atishi ki

main wadi-e-ishq mein jo aaya

majnun ne meri na ham-sari ki

khate nahin ab tere nusairi

saugand bhi murtaza-ali ki

kya reKHta kam hai 'mushafi' ka

bu aati hai is mein farsi ki