ishq mein rangin jawani ho gai

'ishq meñ rangīñ javānī ho ga.ī

zindagānī zindagānī ho ga.ī

tum jo yaad aa.e to saarī kā.ināt

ek bhūlī sī kahānī ho ga.ī

maut samjhā thā maiñ ulfat ko magar

vo hayāt-e-jāvedānī ho ga.ī

ḳhūñfishāñ the sab mire zaḳhm-e-jigar

hañs paḌe tum gulfishānī ho ga.ī

un kī āñkheñ dekh kar apnī nazar

kāshif-e-rāz-e-nihānī ho ga.ī

chalte chalte un kī teġh-e-ābdār

mauj-e-āb-e-zindagānī ho ga.ī

phir hai dil sargarm-e-nāla shaam se

raat phir apnī suhānī ho ga.ī

ḳhāmushī se khul ga.e asrār-e-haq

soz-e-jāñ ik be-zabānī ho ga.ī

ham ne jis duniyā ko dekhā thā 'jalīl'

aaj vo qissa kahānī ho ga.ī

'ishq mein rangin jawani ho gai

zindagani zindagani ho gai

tum jo yaad aae to sari kainat

ek bhuli si kahani ho gai

maut samjha tha main ulfat ko magar

wo hayat-e-jawedani ho gai

KHunfishan the sab mere zaKHm-e-jigar

hans paDe tum gulfishani ho gai

un ki aankhen dekh kar apni nazar

kashif-e-raaz-e-nihani ho gai

chalte chalte un ki tegh-e-abdar

mauj-e-ab-e-zindagani ho gai

phir hai dil sargarm-e-nala sham se

raat phir apni suhani ho gai

KHamushi se khul gae asrar-e-haq

soz-e-jaan ek be-zabani ho gai

hum ne jis duniya ko dekha tha 'jalil'

aaj wo qissa kahani ho gai