is se pahle ki meri jaan jawani guzre

is se pahle ki mirī jaan javānī guzre

tere kānoñ se kabhī merī kahānī guzre

merā bhī she'r koī terī zabānī guzre

pahlā misra' na sahī misra'-e-sānī guzre

ham bhī guzre haiñ mohabbat ke isī 'ālam se

toḌ ke jaise kināre kahīñ paanī guzre

itnī ḳhāmoshī se guzre haiñ tirī raah se ham

jitnī ḳhāmoshī se dariyā kī ravānī guzre

bas yahī soch ke ġhazleñ maiñ kahā kartā huuñ

tere hoñToñ se kabhī kaash ye baanī guzre

kaash ik raat vo mahkā ke chalī jaa.e mujhe

mere āñgan se kabhī raat kī raanī guzre

sard ik aah mire lab se chalī aatī hai

jab koī yaad mire dil se purānī guzre

pyaar bhī tanz bhī dhoka bhī numā.ish bhī 'kabīr'

ik tabassum meñ tire kitne ma'ānī guzre

is se pahle ki meri jaan jawani guzre

tere kanon se kabhi meri kahani guzre

mera bhi she'r koi teri zabani guzre

pahla misra' na sahi misra'-e-sani guzre

hum bhi guzre hain mohabbat ke isi 'alam se

toD ke jaise kinare kahin pani guzre

itni KHamoshi se guzre hain teri rah se hum

jitni KHamoshi se dariya ki rawani guzre

bas yahi soch ke ghazlen main kaha karta hun

tere honTon se kabhi kash ye bani guzre

kash ek raat wo mahka ke chali jae mujhe

mere aangan se kabhi raat ki rani guzre

sard ek aah mere lab se chali aati hai

jab koi yaad mere dil se purani guzre

pyar bhi tanz bhi dhoka bhi numaish bhi 'kabir'

ek tabassum mein tere kitne ma'ani guzre