chaman mein husn ki dekhi wo dil-kashi maine

chaman meñ husn kī dekhī vo dil-kashī maiñ ne

nigāh-e-shauq se chūmī kalī kalī maiñ ne

javāniyoñ ke hasīñ paikaroñ kī yūrish thī

taḌap ke jhoñk dī sho'loñ meñ zindagī maiñ ne

hañsī ko naaz ḳhushī ko ġhurūr hai to rahe

ġham-o-alam se baḌhā lī hai dostī maiñ ne

musībatoñ kī farāvāniyoñ se ghabrā kar

ilāhī tauba añdhā-dhuñd sharāb pī maiñ ne

vatan se duur aziyyat ke ḳhārzāroñ meñ

taḌap taḌap ke guzārī hai zindagī maiñ ne

sune haiñ tā'ne bhī fiqre bhī tanz bhī hañs kar

tamām zahr piye haiñ ḳhushī ḳhushī maiñ ne

ta'alluqāt kī kaḌiyāñ banīñ jo nang-e-vafā

diyā vo jhaTkā ki zanjīr toḌ dī maiñ ne

charāġh-e-sabr jalā kar siyāh rātoñ meñ

ġharīb-ḳhāne meñ kar lī hai raushnī maiñ ne

chaman mein husn ki dekhi wo dil-kashi main ne

nigah-e-shauq se chumi kali kali main ne

jawaniyon ke hasin paikaron ki yurish thi

taDap ke jhonk di sho'lon mein zindagi main ne

hansi ko naz KHushi ko ghurur hai to rahe

gham-o-alam se baDha li hai dosti main ne

musibaton ki farawaniyon se ghabra kar

ilahi tauba andha-dhund sharab pi main ne

watan se dur aziyyat ke KHarzaron mein

taDap taDap ke guzari hai zindagi main ne

sune hain ta'ne bhi fiqre bhi tanz bhi hans kar

tamam zahr piye hain KHushi KHushi main ne

ta'alluqat ki kaDiyan banin jo nang-e-wafa

diya wo jhaTka ki zanjir toD di main ne

charagh-e-sabr jala kar siyah raaton mein

gharib-KHane mein kar li hai raushni main ne