jawani ke tarane ga raha hun

javānī ke tarāne gā rahā huuñ

dabī chingāriyāñ sulgā rahā huuñ

mirī bazm-e-vafā se jaane vaalo

Thahar jaao ki maiñ bhī aa rahā huuñ

butoñ ko qaul detā huuñ vafā kā

qasam apne ḳhudā kī khā rahā huuñ

vafā kā lāzmī thā ye natīja

sazā apne kiye kī pā rahā huuñ

ḳhudā-lagtī kaho but-ḳhāne vaalo

tumhāre saath meñ kaisā rahā huuñ

zahe vo gosha-e-rāhat ki jis meñ

hujūm-e-ranj le kar jā rahā huuñ

charāġh-e-ḳhāna-e-darvesh huuñ maiñ

idhar jaltā udhar bujhtā rahā huuñ

na.e kā'be kī buniyādoñ se pūchho

purāne but-kade kyuuñ Dhā rahā huuñ

nahīñ kāñTe bhī kyā ujḌe chaman meñ

koī roke mujhe maiñ jā rahā huuñ

huī jaatī hai kyuuñ betāb manzil

musalsal chal rahā huuñ aa rahā huuñ

'hafīz' apne parā.e ban rahe haiñ

ki maiñ dil ko zabāñ pe lā rahā huuñ

jawani ke tarane ga raha hun

dabi chingariyan sulga raha hun

meri bazm-e-wafa se jaane walo

Thahar jao ki main bhi aa raha hun

buton ko qaul deta hun wafa ka

qasam apne KHuda ki kha raha hun

wafa ka lazmi tha ye natija

saza apne kiye ki pa raha hun

KHuda-lagti kaho but-KHane walo

tumhaare sath mein kaisa raha hun

zahe wo gosha-e-rahat ki jis mein

hujum-e-ranj le kar ja raha hun

charagh-e-KHana-e-darwesh hun main

idhar jalta udhar bujhta raha hun

nae ka'be ki buniyaadon se puchho

purane but-kade kyun Dha raha hun

nahin kanTe bhi kya ujDe chaman mein

koi roke mujhe main ja raha hun

hui jati hai kyun betab manzil

musalsal chal raha hun aa raha hun

'hafiz' apne parae ban rahe hain

ki main dil ko zaban pe la raha hun