jangalon ki ye muhim hai raKHt-e-jaan koi nahin

jañgaloñ kī ye muhim hai raḳht-e-jāñ koī nahīñ

sañg-rezoñ kī girah meñ kahkashāñ koī nahīñ

kyā ḳhabar hai kis kināre is safar kī shaam ho

kashti-e-umr-e-ravāñ meñ bādbāñ koī nahīñ

āshiqoñ ne sirf apne dukh ko samjhā mo'tabar

mehr sab kī aarzū hai mehrbāñ koī nahīñ

ek dariyā paar kar ke aa gayā huuñ us ke paas

ek sahrā ke sivā ab darmiyāñ koī nahīñ

hasratoñ kī aabrū tahzīb-e-ġham se bach ga.ī

is nafāsat se jalā hai dil dhuāñ koī nahīñ

kaT chuke haiñ apne maazī se suḳhan ke pesha-var

marsiya-go so chuke aur qissa-ḳhvāñ koī nahīñ

pūchhtā hai aaj un kā be-takalluf sā libās

is galī meñ kyā jiyālā naujavāñ koī nahīñ

vo rahe qaid-e-zamāñ meñ jo makīn-e-ām ho

lamha lamha jiine vāloñ kā makāñ koī nahīñ

majlisoñ kī ḳhaak chhānī to khulā mujh par 'na.īm'

aazmī sā ḳhush-nigāh o ḳhush-bayāñ koī nahīñ

jangalon ki ye muhim hai raKHt-e-jaan koi nahin

sang-rezon ki girah mein kahkashan koi nahin

kya KHabar hai kis kinare is safar ki sham ho

kashti-e-umr-e-rawan mein baadban koi nahin

aashiqon ne sirf apne dukh ko samjha mo'tabar

mehr sab ki aarzu hai mehrban koi nahin

ek dariya par kar ke aa gaya hun us ke pas

ek sahra ke siwa ab darmiyan koi nahin

hasraton ki aabru tahzib-e-gham se bach gai

is nafasat se jala hai dil dhuan koi nahin

kaT chuke hain apne mazi se suKHan ke pesha-war

marsiya-go so chuke aur qissa-KHwan koi nahin

puchhta hai aaj un ka be-takalluf sa libas

is gali mein kya jiyala naujawan koi nahin

wo rahe qaid-e-zaman mein jo makin-e-am ho

lamha lamha jine walon ka makan koi nahin

majlison ki KHak chhani to khula mujh par 'naim'

aazmi sa KHush-nigah o KHush-bayan koi nahin