jalwa-gar sochon mein hain kuchh aagahi ke aaftab

jalva-gar sochoñ meñ haiñ kuchh āgahī ke āftāb

raushnī se likh rahā huuñ zindagānī kā nisāb

pattharoñ se kab talak bāñdhegī ummīd-e-vafā

zindagī dekhegī kab tak jāgtī āñkhoñ se ḳhvāb

kyā ḳhabar vo kaun haiñ roz-e-jazā ke muntazir

chashm-e-bīnā ke liye har roz hai roz-e-hisāb

ḳhaak zinda gar kare husn-e-azal kī aarzū

darmiyāñ rahtā nahīñ phir koī bhī tār-e-hijāb

jānte haiñ vo husūl-e-māya kī har ik sabīl

hifz haiñ sajjādgāñ ko ḳhānqāhī ke nisāb

inqalāb-e-sub.h kī kuchh kam nahīñ ye bhī dalīl

pattharoñ ko de rahe haiñ aa.ine khul kar javāb

jalwa-gar sochon mein hain kuchh aagahi ke aaftab

raushni se likh raha hun zindagani ka nisab

pattharon se kab talak bandhegi ummid-e-wafa

zindagi dekhegi kab tak jagti aankhon se KHwab

kya KHabar wo kaun hain roz-e-jaza ke muntazir

chashm-e-bina ke liye har roz hai roz-e-hisab

KHak zinda gar kare husn-e-azal ki aarzu

darmiyan rahta nahin phir koi bhi tar-e-hijab

jaante hain wo husul-e-maya ki har ek sabil

hifz hain sajjadgan ko KHanqahi ke nisab

inqalab-e-subh ki kuchh kam nahin ye bhi dalil

pattharon ko de rahe hain aaine khul kar jawab