jalwa dikhlae jo wo apni KHud-arai ka

jalva dikhlā.e jo vo apnī ḳhud-ārā.ī kā

nuur jal jaa.e abhī chashm-e-tamāshā.ī kā

rañg har phuul meñ hai husn-e-ḳhud-ārā.ī kā

chaman-e-dahr hai mahzar tirī yaktā.ī kā

apne markaz kī taraf mā.il-e-parvāz thā husn

bhūltā hī nahīñ aalam tirī añgḌā.ī kā

uf tire husn-e-jahāñ-soz kī pur-zor kashish

nuur sab kheñch liyā chashm-e-tamāshā.ī kā

dekh kar nazm-e-do-ālam hameñ kahnā hī paḌā

ye salīqa hai kase anjuman-ārā.ī kā

kal jo gulzār meñ haiñ gosh-bar-āvāz 'azīz'

mujh se bulbul ne liyā tarz ye shevā.ī kā

jalwa dikhlae jo wo apni KHud-arai ka

nur jal jae abhi chashm-e-tamashai ka

rang har phul mein hai husn-e-KHud-arai ka

chaman-e-dahr hai mahzar teri yaktai ka

apne markaz ki taraf mail-e-parwaz tha husn

bhulta hi nahin aalam teri angDai ka

uf tere husn-e-jahan-soz ki pur-zor kashish

nur sab khench liya chashm-e-tamashai ka

dekh kar nazm-e-do-alam hamein kahna hi paDa

ye saliqa hai kase anjuman-arai ka

kal jo gulzar mein hain gosh-bar-awaz 'aziz'

mujh se bulbul ne liya tarz ye shewai ka