kyun main taskin-e-dil ai yar karun ya na karun

kyuuñ maiñ taskīn-e-dil ai yaar karūñ yā na karūñ

naala jā kar pas-e-dīvār karūñ yā na karūñ

sun le ik baat mirī tū ki ramaq hai baaqī

phir suḳhan tujh se sitam-kār karūñ yā na karūñ

saḳht mushkil hai ki har baat kināya samjho

hai zabāñ merī bhī guftār karūñ yā na karūñ

ḳhvāb-e-shīrīñ meñ hai aur dil hai mirā mā.il-e-shauq

jī dhaḌaktā hai ki bedār karūñ yā na karūñ

mausam-e-gul hī meñ sayyād se jā kar yaaro

zikr-e-murġhān-e-giraftār karūñ yā na karūñ

'ahd thā tujh se ki bhar 'umr vafā kariyegā

in sulūkoñ pe jafākār karūñ yā na karūñ

kūcha-e-yār ko maiñ rashk-e-chaman ai 'saudā'

jā ke bā-dīda-e-ḳhūñbār karūñ yā na karūñ

kyun main taskin-e-dil ai yar karun ya na karun

nala ja kar pas-e-diwar karun ya na karun

sun le ek baat meri tu ki ramaq hai baqi

phir suKHan tujh se sitam-kar karun ya na karun

saKHt mushkil hai ki har baat kinaya samjho

hai zaban meri bhi guftar karun ya na karun

KHwab-e-shirin mein hai aur dil hai mera mail-e-shauq

ji dhaDakta hai ki bedar karun ya na karun

mausam-e-gul hi mein sayyaad se ja kar yaro

zikr-e-murghan-e-giraftar karun ya na karun

'ahd tha tujh se ki bhar 'umr wafa kariyega

in sulukon pe jafakar karun ya na karun

kucha-e-yar ko main rashk-e-chaman ai 'sauda'

ja ke ba-dida-e-KHunbar karun ya na karun