ye log jabr pe karte jo ehtijaj nahin

ye log jabr pe karte jo ehtijāj nahīñ

so in se is liye miltā mirā mizāj nahīñ

jo sach batā.e vo pāgal batāyā jaatā hai

yahāñ pe haq ko samajhne kā ab rivāj nahīñ

ġhanīm-e-shahr ko mā'lūm hī nahīñ ki mujhe

ba-juz ḳhudā ke kisī kā bhī ehtiyāj nahīñ

samāj kyā hai mire aap ke ravayye haiñ

bure to log haiñ bhaa.ī burā samāj nahīñ

hameñ to masnad-e-'ishq-o-vafā 'atā huī hai

hamāre zehn pe chhā.e ye taḳht-o-tāj nahīñ

sabhī ko zehnī ġhulāmī kā ek tumor hai

maraz to kaafī purānā hai lā-'ilāj nahīñ

ye saada baat batāne meñ kyā ta.ammul hai

vo mere kal meñ nahīñ hai maiñ jis kā aaj nahīñ

kabhī-kabhār maiñ sochūñ to kaañp uThtā huuñ

zamīñ ḳhudā kī hai lekin ḳhudā kā raaj nahīñ

ye log jabr pe karte jo ehtijaj nahin

so in se is liye milta mera mizaj nahin

jo sach batae wo pagal bataya jata hai

yahan pe haq ko samajhne ka ab riwaj nahin

ghanim-e-shahr ko ma'lum hi nahin ki mujhe

ba-juz KHuda ke kisi ka bhi ehtiyaj nahin

samaj kya hai mere aap ke rawayye hain

bure to log hain bhai bura samaj nahin

hamein to masnad-e-'ishq-o-wafa 'ata hui hai

hamare zehn pe chhae ye taKHt-o-taj nahin

sabhi ko zehni ghulami ka ek tumor hai

maraz to kafi purana hai la-'ilaj nahin

ye sada baat batane mein kya tammul hai

wo mere kal mein nahin hai main jis ka aaj nahin

kabhi-kabhaar main sochun to kanp uThta hun

zamin KHuda ki hai lekin KHuda ka raj nahin