KHwab ke moti piro lene ka mauqa hi na tha

ḳhvāb ke motī piro lene kā mauqa' hī na thā

us ko āñkhoñ meñ samo lene kā mauqa' hī na thā

is ko kahte haiñ ai yād-e-yār jabr-e-zindagī

ham ko tere saath ho lene kā mauqa' hī na thā

jo tavaqqo' duniyā kar letī thī ban jaate the ham

yā'nī apnā aap ho lene kā mauqa' hī na thā

māñdgāñ nigrāñ the apnī samt ummīdeñ liye

raftagāñ jaate the ro lene kā mauqa' hī na thā

tez-gām itnā thā apnā shauq bas chalte rahe

the shajar har jā pe so lene kā mauqa' hī na thā

dāġh-e-dil aisā ki jal uThtā thā har do gaam par

mansab aisā thā ki dho lene kā mauqa' hī na thā

KHwab ke moti piro lene ka mauqa' hi na tha

us ko aankhon mein samo lene ka mauqa' hi na tha

is ko kahte hain ai yaad-e-yar jabr-e-zindagi

hum ko tere sath ho lene ka mauqa' hi na tha

jo tawaqqo' duniya kar leti thi ban jate the hum

ya'ni apna aap ho lene ka mauqa' hi na tha

mandgan nigran the apni samt ummiden liye

raftagan jate the ro lene ka mauqa' hi na tha

tez-gam itna tha apna shauq bas chalte rahe

the shajar har ja pe so lene ka mauqa' hi na tha

dagh-e-dil aisa ki jal uThta tha har do gam par

mansab aisa tha ki dho lene ka mauqa' hi na tha