ishq ne husn ki be-dad pe rona chaha

ishq ne husn kī be-dād pe ronā chāhā

tuḳhm-e-ehsās-e-vafā sañg meñ bonā chāhā

aane vaale kisī tūfān kā ronā ro kar

nā-ḳhudā ne mujhe sāhil pe Dubonā chāhā

sañg-dil kyuuñ na kaheñ but-kade vaale mujh ko

maiñ ne patthar kā parastār na honā chāhā

hazrat-e-shaiḳh na samjhe mire dil kī qīmat

le ke tasbīh ke rishte meñ pironā chāhā

koī mazkūr na thā ġhair kā lekin tum ne

bātoñ bātoñ meñ ye nashtar bhī chubhonā chāhā

dīda-e-tar se bhī sarzad huā ik jurm-e-azīm

hashr meñ nāma-e-a.amāl ko dhonā chāhā

marte marte bhī tavaqqo.a rahī dildārī kī

rakh ke sar zānū-e-taqdīr pe sonā chāhā

haa.e kis dard se kī zabt kī talqīn mujhe

hañs paḌe dost jo maiñ ne kabhī ronā chāhā

jins-e-shohrat bahut arzāñ thī magar maiñ ne 'hafīz'

daulat-e-dard ko be-kār na khonā chāhā

ishq ne husn ki be-dad pe rona chaha

tuKHm-e-ehsas-e-wafa sang mein bona chaha

aane wale kisi tufan ka rona ro kar

na-KHuda ne mujhe sahil pe Dubona chaha

sang-dil kyun na kahen but-kade wale mujh ko

main ne patthar ka parastar na hona chaha

hazrat-e-shaiKH na samjhe mere dil ki qimat

le ke tasbih ke rishte mein pirona chaha

koi mazkur na tha ghair ka lekin tum ne

baaton baaton mein ye nashtar bhi chubhona chaha

dida-e-tar se bhi sarzad hua ek jurm-e-azim

hashr mein nama-e-amal ko dhona chaha

marte marte bhi tawaqqoa rahi dildari ki

rakh ke sar zanu-e-taqdir pe sona chaha

hae kis dard se ki zabt ki talqin mujhe

hans paDe dost jo main ne kabhi rona chaha

jins-e-shohrat bahut arzan thi magar main ne 'hafiz'

daulat-e-dard ko be-kar na khona chaha