ishq karo to ye bhi socho arz-e-sawal se pahle

ishq karo to ye bhī socho arz-e-savāl se pahle

hijr kī puurī raat aatī hai sub.h-e-visāl se pahle

dil kā kyā hai dil ne kitne manzar dekhe lekin

āñkheñ pāgal ho jaatī haiñ ek ḳhayāl se pahle

kis ne ret uḌaa.ī shab meñ āñkheñ khol ke rakkhīñ

koī misāl to honā us kī misāl se pahle

kār-e-mohabbat ek safar hai is meñ aa jaatā hai

ek zavāl-āsār sā rasta bāb-e-kamāl se pahle

ishq meñ resham jaise vādoñ aur ḳhvāboñ kā rasta

jitnā mumkin ho tai kar leñ gard-e-malāl se pahle

ishq karo to ye bhi socho arz-e-sawal se pahle

hijr ki puri raat aati hai subh-e-visal se pahle

dil ka kya hai dil ne kitne manzar dekhe lekin

aankhen pagal ho jati hain ek KHayal se pahle

kis ne ret uDai shab mein aankhen khol ke rakkhin

koi misal to hona us ki misal se pahle

kar-e-mohabbat ek safar hai is mein aa jata hai

ek zawal-asar sa rasta bab-e-kamal se pahle

ishq mein resham jaise wadon aur KHwabon ka rasta

jitna mumkin ho tai kar len gard-e-malal se pahle