ishq ka rog to wirse mein mila tha mujhko

ishq kā rog to virse meñ milā thā mujh ko

dil dhaḌaktā huā siine meñ milā thā mujh ko

haañ ye kāfir usī hujre meñ milā thā mujh ko

ek momin jahāñ sajde meñ milā thā mujh ko

us ko bhī merī tarah apnī vafā par thā yaqīñ

vo bhī shāyad isī dhoke meñ milā thā mujh ko

us ne hī bazm ke ādāb sikhā.e the mujhe

vo jo ik shaḳhs akele meñ milā thā mujh ko

manzil-e-hosh pe ik maiñ hī nahīñ thā tanhā

yaañ to har shaḳhs hī nashshe meñ milā thā mujh ko

ye bhī ik aib thā merī hī nazar kā shāyad

roz kuchh farq sā chehre meñ milā thā mujh ko

aise hālāt meñ kyā us se gilā kartā maiñ

raat sūraj bhī añdhere meñ milā thā mujh ko

maiñ agar Duub na jaatā to vahāñ kyā kartā

ik samundar thā jo qatre meñ milā thā mujh ko

ruuh kī pyaas bujhānā koī āsān na thā

saaf paanī baḌe gahre meñ milā thā mujh ko

sach to ye hai ki yahāñ koī bhī manzil hī na thī

vo bhī rasta thā jo raste meñ milā thā mujh ko

ishq ka rog to wirse mein mila tha mujh ko

dil dhaDakta hua sine mein mila tha mujh ko

han ye kafir usi hujre mein mila tha mujh ko

ek momin jahan sajde mein mila tha mujh ko

us ko bhi meri tarah apni wafa par tha yaqin

wo bhi shayad isi dhoke mein mila tha mujh ko

us ne hi bazm ke aadab sikhae the mujhe

wo jo ek shaKHs akele mein mila tha mujh ko

manzil-e-hosh pe ek main hi nahin tha tanha

yan to har shaKHs hi nashshe mein mila tha mujh ko

ye bhi ek aib tha meri hi nazar ka shayad

roz kuchh farq sa chehre mein mila tha mujh ko

aise haalat mein kya us se gila karta main

raat suraj bhi andhere mein mila tha mujh ko

main agar Dub na jata to wahan kya karta

ek samundar tha jo qatre mein mila tha mujh ko

ruh ki pyas bujhana koi aasan na tha

saf pani baDe gahre mein mila tha mujh ko

sach to ye hai ki yahan koi bhi manzil hi na thi

wo bhi rasta tha jo raste mein mila tha mujh ko