ishq aur itna mohazzab chhoD kar diwana-pan

ishq aur itnā mohazzab chhoḌ kar dīvāna-pan

band uupar se tale tak shervānī ke baTan

ishq kī dīvāngī vaz-e-junūñ ke saath thī

chāk-e-dil bhī sil gayā jab se siyā hai pairahan

dil ko muzhda ho ki vo bhī ḳhair se jaatī rahī

aah se pahle jo kuchh mahsūs hotī thī dukhan

un ko jalvat kī havas mahfil meñ tanhā kar ga.ī

jo kabhī hote the apnī zaat se ik anjuman

shāḳh-e-gul ban kar lachakte haiñ havas kī bazm meñ

ye vahī haiñ jin meñ thā talvār kā sā bāñkpan

ḳhush-numā lafzoñ kī rishvat de ke raazī kījiye

ruuh kī tauhīn par āmāda rahtā hai badan

marg-e-shahr-e-ārzū kā kar chuke mātam 'salīm'

aao in lāshoñ ko ab lafzoñ kā pahnā.eñ kafan

ishq aur itna mohazzab chhoD kar diwana-pan

band upar se tale tak sherwani ke baTan

ishq ki diwangi waz-e-junun ke sath thi

chaak-e-dil bhi sil gaya jab se siya hai pairahan

dil ko muzhda ho ki wo bhi KHair se jati rahi

aah se pahle jo kuchh mahsus hoti thi dukhan

un ko jalwat ki hawas mahfil mein tanha kar gai

jo kabhi hote the apni zat se ek anjuman

shaKH-e-gul ban kar lachakte hain hawas ki bazm mein

ye wahi hain jin mein tha talwar ka sa bankpan

KHush-numa lafzon ki rishwat de ke raazi kijiye

ruh ki tauhin par aamada rahta hai badan

marg-e-shahr-e-arzu ka kar chuke matam 'salim'

aao in lashon ko ab lafzon ka pahnaen kafan