is waste daman chaak kiya shayad ye junun kaam aa jae

is vāste dāman chaak kiyā shāyad ye junūñ kaam aa jaa.e

dīvāna samajh kar hī un ke hoñToñ pe mirā naam aa jaa.e

maiñ ḳhush huuñ agar gulshan ke liye kuchh merā lahū kaam aa jaa.e

lekin mujh ko Dar hai is kā gulchīñ pe na ilzām aa jaa.e

ai kaash hamārī qismat meñ aisī bhī koī shaam aa jaa.e

ik chāñd falak par niklā ho ik chāñd sar-e-bām aa jaa.e

mai-ḳhāna salāmat rah jaa.e is kī to kisī ko fikr nahīñ

mai-ḳhvār haiñ bas is ḳhvāhish meñ saaqī pe kuchh ilzām aa jaa.e

piine kā salīqa kuchh bhī nahīñ is par hai ye ḳhvāhish rindoñ kī

jis jaam pe haq hai saaqī kā hāthoñ meñ vahī jaam aa jaa.e

is vāste ḳhāk-e-parvāna par sham.a bahātī hai aañsū

mumkin hai vafā ke qisse meñ us kā bhī kahīñ naam aa jaa.e

afsāna mukammal hai lekin afsāne kā unvāñ kuchh bhī nahīñ

ai maut bas itnī mohlat de un kā koī paiġhām aa jaa.e

is waste daman chaak kiya shayad ye junun kaam aa jae

diwana samajh kar hi un ke honTon pe mera nam aa jae

main KHush hun agar gulshan ke liye kuchh mera lahu kaam aa jae

lekin mujh ko Dar hai is ka gulchin pe na ilzam aa jae

ai kash hamari qismat mein aisi bhi koi sham aa jae

ek chand falak par nikla ho ek chand sar-e-baam aa jae

mai-KHana salamat rah jae is ki to kisi ko fikr nahin

mai-KHwar hain bas is KHwahish mein saqi pe kuchh ilzam aa jae

pine ka saliqa kuchh bhi nahin is par hai ye KHwahish rindon ki

jis jam pe haq hai saqi ka hathon mein wahi jam aa jae

is waste KHak-e-parwana par shama bahati hai aansu

mumkin hai wafa ke qisse mein us ka bhi kahin nam aa jae

afsana mukammal hai lekin afsane ka unwan kuchh bhi nahin

ai maut bas itni mohlat de un ka koi paigham aa jae