is shahr ke logon pe KHatm sahi KHush-talati-o-gul-pairahni

is shahr ke logoñ pe ḳhatm sahī ḳhush-tal.atī-o-gul-pairahnī

mire dil kī to pyaas kabhī na bujhī mire jī kī to baat kabhī na banī

abhī kal hī kī baat hai jān-e-jahāñ yahāñ fiil ke fiil the shor-kunāñ

ab nāra-e-ishq na zarb-e-fuġhāñ ga.e kaun nagar vo vafā ke dhanī

koī aur bhī morid-e-lutf huā milī ahl-e-havas ko havas kī sazā

tire shahr meñ the hamīñ ahl-e-vafā milī ek hamīñ ko jilā-vatanī

ye to sach hai ki ham tujhe pā na sake tirī yaad bhī jī se bhulā na sake

tirā daaġh hai dil meñ charāġh-sifat tire naam kī zeb-e-gulū-kafnī

tum saḳhtī-e-rāh kā ġham na karo har daur kī raah meñ ham-safaro

jahāñ dasht-e-ḳhizāñ vahīñ vādī-e-gul jahāñ dhuup kaḌī vahāñ chhāñv ghanī

is 'ishq ke dard kī kaun davā magar ek vazīfa hai ek du'ā

paḌho 'mīr'-o-'kabīr' ke bait kabit suno she'r-e-'nazīr' faqīr-o-ġhanī

is shahr ke logon pe KHatm sahi KHush-talati-o-gul-pairahni

mere dil ki to pyas kabhi na bujhi mere ji ki to baat kabhi na bani

abhi kal hi ki baat hai jaan-e-jahan yahan fil ke fil the shor-kunan

ab nara-e-ishq na zarb-e-fughan gae kaun nagar wo wafa ke dhani

koi aur bhi morid-e-lutf hua mili ahl-e-hawas ko hawas ki saza

tere shahr mein the hamin ahl-e-wafa mili ek hamin ko jila-watani

ye to sach hai ki hum tujhe pa na sake teri yaad bhi ji se bhula na sake

tera dagh hai dil mein charagh-sifat tere nam ki zeb-e-gulu-kafni

tum saKHti-e-rah ka gham na karo har daur ki rah mein ham-safaro

jahan dasht-e-KHizan wahin wadi-e-gul jahan dhup kaDi wahan chhanw ghani

is 'ishq ke dard ki kaun dawa magar ek wazifa hai ek du'a

paDho 'mir'-o-'kabir' ke bait kabit suno she'r-e-'nazir' faqir-o-ghani