is qadar musalsal thin shiddaten judai ki

is qadar musalsal thiiñ shiddateñ judā.ī kī

aaj pahlī baar us se maiñ ne bevafā.ī kī

varna ab talak yuuñ thā ḳhvāhishoñ kī bārish meñ

yā to TuuT kar royā yā ġhazal-sarā.ī kī

taj diyā thā kal jin ko ham ne terī chāhat meñ

aaj un se majbūran taaza āshnā.ī kī

ho chalā thā jab mujh ko iḳhtilāf apne se

tū ne kis ghaḌī zālim merī ham-navā.ī kī

tark kar chuke qāsid kū-e-nā-murādāñ ko

kaun ab ḳhabar laave shahr-e-āshnā.ī kī

tanz o ta.ana o tohmat sab hunar haiñ nāseh ke

aap se koī pūchhe ham ne kyā burā.ī kī

phir qafas meñ shor uTThā qaidiyoñ kā aur sayyād

dekhnā uḌā degā phir ḳhabar rihā.ī kī

dukh huā jab us dar par kal 'farāz' ko dekhā

laakh aib the us meñ ḳhū na thī gadā.ī kī

is qadar musalsal thin shiddaten judai ki

aaj pahli bar us se main ne bewafai ki

warna ab talak yun tha KHwahishon ki barish mein

ya to TuT kar roya ya ghazal-sarai ki

taj diya tha kal jin ko hum ne teri chahat mein

aaj un se majburan taza aashnai ki

ho chala tha jab mujh ko iKHtilaf apne se

tu ne kis ghaDi zalim meri ham-nawai ki

tark kar chuke qasid ku-e-na-muradan ko

kaun ab KHabar lawe shahr-e-ashnai ki

tanz o tana o tohmat sab hunar hain naseh ke

aap se koi puchhe hum ne kya burai ki

phir qafas mein shor uTTha qaidiyon ka aur sayyaad

dekhna uDa dega phir KHabar rihai ki

dukh hua jab us dar par kal 'faraaz' ko dekha

lakh aib the us mein KHu na thi gadai ki