is naz is andaz se tum hae chalo ho

is naaz is andāz se tum haa.e chalo ho

roz ek ġhazal ham se kahlvā.e chalo ho

rakhnā hai kahīñ paañv to rakkho ho kahīñ paañv

chalnā zarā aayā hai to itrā.e chalo ho

dīvāna-e-gul qaidi-e-zanjīr haiñ aur tum

kyā ThaaT se gulshan kī havā khaa.e chalo ho

mai meñ koī ḳhāmī hai na sāġhar meñ koī khoT

piinā nahīñ aa.e hai to chhalkā.e chalo ho

ham kuchh nahīñ kahte haiñ koī kuchh nahīñ kahtā

tum kyā ho tumhīñ sab se kahlvā.e chalo ho

zulfoñ kī to fitrat hī hai lekin mire pyāre

zulfoñ se ziyāda tumhīñ bal khaa.e chalo ho

vo shoḳh sitamgar to sitam Dhaa.e chale hai

tum ho ki 'kalīm' apnī ġhazal gaa.e chalo ho

is naz is andaz se tum hae chalo ho

roz ek ghazal hum se kahlwae chalo ho

rakhna hai kahin panw to rakkho ho kahin panw

chalna zara aaya hai to itrae chalo ho

diwana-e-gul qaidi-e-zanjir hain aur tum

kya ThaT se gulshan ki hawa khae chalo ho

mai mein koi KHami hai na saghar mein koi khoT

pina nahin aae hai to chhalkae chalo ho

hum kuchh nahin kahte hain koi kuchh nahin kahta

tum kya ho tumhin sab se kahlwae chalo ho

zulfon ki to fitrat hi hai lekin mere pyare

zulfon se ziyaada tumhin bal khae chalo ho

wo shoKH sitamgar to sitam Dhae chale hai

tum ho ki 'kalim' apni ghazal gae chalo ho