is darja bad-guman hain KHulus-e-bashar se hum

is darja bad-gumāñ haiñ ḳhulūs-e-bashar se ham

apnoñ ko dekhte haiñ parā.ī nazar se ham

ġhunchoñ se pyaar kar ke ye izzat hameñ milī

chūme qadam bahār ne guzre jidhar se ham

vallāh tujh se tark-e-ta.alluq ke ba.ad bhī

aksar guzar ga.e haiñ tirī rah-guzar se ham

sidq-o-safā-e-qalb se mahrūm hai hayāt

karte haiñ bandagī bhī jahannam ke Dar se ham

uqbā meñ bhī milegī yahī zindagī 'shakīl'

mar kar na chhūT pā.eñge is dard-e-sar se ham

is darja bad-guman hain KHulus-e-bashar se hum

apnon ko dekhte hain parai nazar se hum

ghunchon se pyar kar ke ye izzat hamein mili

chume qadam bahaar ne guzre jidhar se hum

wallah tujh se tark-e-talluq ke baad bhi

aksar guzar gae hain teri rah-guzar se hum

sidq-o-safa-e-qalb se mahrum hai hayat

karte hain bandagi bhi jahannam ke Dar se hum

uqba mein bhi milegi yahi zindagi 'shakil'

mar kar na chhuT paenge is dard-e-sar se hum