sitam pe bhi KHalish-e-intizar hai ki nahin

sitam pe bhī ḳhalish-e-intizār hai ki nahīñ

usī ke vāste dil be-qarār hai ki nahīñ

tumhārā jaur-o-sitam sah ke muskurātā huuñ

mirī vafā pe tumheñ e'tibār hai ki nahīñ

sitam ke baa'd karam be-shumār kyā mā'nī

ye pūchhne kā hameñ iḳhtiyār hai ki nahīñ

chamak rahā hai jo terī qabā-e-rangīñ meñ

vo mere chāk-garebāñ kā taar hai ki nahīñ

ye dekhnā hai mujhe aaj terī mahfil meñ

ḳhatā pe apnī koī sharmsār hai ki nahīñ

jo bulbuloñ ke tarānoñ se gūñjtā thā kabhī

vo lāla-zār ab ujḌā dayār hai ki nahīñ

hameñ na faḳhr ho kyuuñ ḳhud pe gulsitāñ vaalo

hamāre dam se chaman meñ bahār hai ki nahīñ

unheñ ġhurūr thā ai 'nūr' jis gulistāñ par

vo aaj daur-e-ḳhizāñ kā shikār hai ki nahīñ

sitam pe bhi KHalish-e-intizar hai ki nahin

usi ke waste dil be-qarar hai ki nahin

tumhaara jaur-o-sitam sah ke muskuraata hun

meri wafa pe tumhein e'tibar hai ki nahin

sitam ke ba'd karam be-shumar kya ma'ni

ye puchhne ka hamein iKHtiyar hai ki nahin

chamak raha hai jo teri qaba-e-rangin mein

wo mere chaak-gareban ka tar hai ki nahin

ye dekhna hai mujhe aaj teri mahfil mein

KHata pe apni koi sharmsar hai ki nahin

jo bulbulon ke taranon se gunjta tha kabhi

wo lala-zar ab ujDa dayar hai ki nahin

hamein na faKHr ho kyun KHud pe gulsitan walo

hamare dam se chaman mein bahaar hai ki nahin

unhen ghurur tha ai 'nur' jis gulistan par

wo aaj daur-e-KHizan ka shikar hai ki nahin