main kahan aur ku-e-yar kahan

maiñ kahāñ aur kū-e-yār kahāñ

vo bulā leñ ye iḳhtiyār kahāñ

aa hī nikle jo mai-kade meñ ham

rah gayā paas nang-o-'ār kahāñ

chashm-e-nargis banā huā hai dil

DhūñDne jaa.eñ tujh ko yaar kahāñ

aa bhī jaao ki ziist ḳhatm huī

rah ga.ī tāb-e-intizār kahāñ

maiñ huuñ mansūr-e-vaqt Dar kis kā

DhūñDtā huuñ chhupā hai daar kahāñ

tham ga.ī gardish-e-zamān-o-makāñ

mai-kade meñ abhī bahār kahāñ

jab se ye kār-o-bār-e-zauq milā

rah gayā zauq-e-kār-o-bār kahāñ

khā rahe haiñ nizām-e-nau kī qasam

bolne lag ga.e mazār kahāñ

aaj 'vāsif' ne phir ġhazal keh dī

ab na kahiye ki baar baar kahāñ

main kahan aur ku-e-yar kahan

wo bula len ye iKHtiyar kahan

aa hi nikle jo mai-kade mein hum

rah gaya pas nang-o-'ar kahan

chashm-e-nargis bana hua hai dil

DhunDne jaen tujh ko yar kahan

aa bhi jao ki zist KHatm hui

rah gai tab-e-intizar kahan

main hun mansur-e-waqt Dar kis ka

DhunDta hun chhupa hai dar kahan

tham gai gardish-e-zaman-o-makan

mai-kade mein abhi bahaar kahan

jab se ye kar-o-bar-e-zauq mila

rah gaya zauq-e-kar-o-bar kahan

kha rahe hain nizam-e-nau ki qasam

bolne lag gae mazar kahan

aaj 'wasif' ne phir ghazal keh di

ab na kahiye ki bar bar kahan