gham ki hai koi sham main kuchh soch raha hun

ġham kī hai koī shaam maiñ kuchh soch rahā huuñ

lab pe hai terā naam maiñ kuchh soch rahā huuñ

hairat se mirī or tū kyuuñ dekh rahā hai

tū haath mirā thaam maiñ kuchh soch rahā huuñ

shāmil to nahīñ is meñ koī zahr kā 'unsur

hāthoñ meñ liye jaam maiñ kuchh soch rahā huuñ

phir dekh ke mai-ḳhāne meñ zāhid kī koī shakl

ai sāqī-e-gulfām maiñ kuchh soch rahā huuñ

kar lī hai tirī aaj har ik fard ne bai'at

is 'ahd kā anjām maiñ kuchh soch rahā huuñ

phir ḳhat ko tire dekh ke uljhī hai tabī'at

phir paḌh ke tirā naam maiñ kuchh soch rahā huuñ

maiñ bhī to khaḌā huuñ tire mai-ḳhvāroñ kī saf meñ

mujh ko bhī to de jaam maiñ kuchh soch rahā huuñ

us zulf-e-siyah-fām se 'mushtāq' tire naam

kab aa.egā paiġhām maiñ kuchh soch rahā huuñ

gham ki hai koi sham main kuchh soch raha hun

lab pe hai tera nam main kuchh soch raha hun

hairat se meri or tu kyun dekh raha hai

tu hath mera tham main kuchh soch raha hun

shamil to nahin is mein koi zahr ka 'unsur

hathon mein liye jam main kuchh soch raha hun

phir dekh ke mai-KHane mein zahid ki koi shakl

ai saqi-e-gulfam main kuchh soch raha hun

kar li hai teri aaj har ek fard ne bai'at

is 'ahd ka anjam main kuchh soch raha hun

phir KHat ko tere dekh ke uljhi hai tabi'at

phir paDh ke tera nam main kuchh soch raha hun

main bhi to khaDa hun tere mai-KHwaron ki saf mein

mujh ko bhi to de jam main kuchh soch raha hun

us zulf-e-siyah-fam se 'mushtaq' tere nam

kab aaega paigham main kuchh soch raha hun