zinda to jism hai bhale wijdan mar gaya

zinda to jism hai bhale vijdān mar gayā

insān DhūñDte hue insān mar gayā

bechā zamīr aur ḳharīdā maqām-e-dahr

daulat to mil ga.ī vale īmān mar gayā

har moḌ par umiid kā sāmāñ bikhar gayā

jiine kī aarzū meñ hī insān mar gayā

har shaḳhs apnī zaat ke andar hī qaid thā

dast-e-talab baḌhā hī thā ehsān mar gayā

mansab kī ek chaah ne aisā badal diyā

kursī to rah ga.ī bhale aivān mar gayā

nafrat kī aag phail ga.ī bastiyoñ ke biich

uljhā jo un sharāroñ se nādān mar gayā

jab se anā ne dil kī hukūmat sambhālī hai

dil meñ vafā kā āḳhrī imkān mar gayā

vo muskurā ke aaj bhī ḳhāmosh hī rahā

kholā jo us ne dar to mirā maan mar gayā

āñkhoñ kī be-niyāzī ne dil kar diyā figār

nazreñ milīñ kuchh aise ki armān mar gayā

sach bolne ke jurm meñ tanhā khaḌī rahī

bātil ke shor meñ mirā e'lān mar gayā

'ambar' likhā jo sach vo thā har daur ke liye

lafzoñ kā qad rahā bhale sultān mar gayā

zinda to jism hai bhale wijdan mar gaya

insan DhunDte hue insan mar gaya

becha zamir aur KHarida maqam-e-dahr

daulat to mil gai wale iman mar gaya

har moD par umid ka saman bikhar gaya

jine ki aarzu mein hi insan mar gaya

har shaKHs apni zat ke andar hi qaid tha

dast-e-talab baDha hi tha ehsan mar gaya

mansab ki ek chah ne aisa badal diya

kursi to rah gai bhale aiwan mar gaya

nafrat ki aag phail gai bastiyon ke bich

uljha jo un shararon se nadan mar gaya

jab se ana ne dil ki hukumat sambhaali hai

dil mein wafa ka aaKHri imkan mar gaya

wo muskura ke aaj bhi KHamosh hi raha

khola jo us ne dar to mera man mar gaya

aankhon ki be-niyazi ne dil kar diya figar

nazren milin kuchh aise ki arman mar gaya

sach bolne ke jurm mein tanha khaDi rahi

baatil ke shor mein mera e'lan mar gaya

'ambar' likha jo sach wo tha har daur ke liye

lafzon ka qad raha bhale sultan mar gaya