KHurshid banaya na qamar humne banaya

ḳhurshīd banāyā na qamar ham ne banāyā

insān ko insān magar ham ne banāyā

ho koī musabbab magar asbāb hamīñ haiñ

duniyā ko ba-alfāz-e-digar ham ne banāyā

parvāz-e-taḳhayyul meñ kabhī 'arsh se guzre

tāroñ ko kabhī gard-e-safar ham ne banāyā

duniyā kī haqīqat to haqīqat meñ nahīñ thī

shā.ista-e-arbāb-e-nazar ham ne banāyā

tinkoñ ko kiyā jam' ba-andāz-e-nasheman

ye sho'bda-e-barq-o-sharar ham ne banāyā

is gardish-e-kaunain kī buniyād hamīñ haiñ

ye silsila-e-shām-o-sahar ham ne banāyā

duniyā meñ rahe bhī to na rahne ke barābar

duniyā ko farāmosh-e-nazar ham ne banāyā

ye jur.at-e-tā'mīr ġhalat ham se huī thī

manzil pe nahīñ raah meñ ghar ham ne banāyā

ai 'josh' mohabbat to thī ik ḳhvāb-e-musalsal

is ḳhvāb ko tā'bīr-e-asar ham ne banāyā

KHurshid banaya na qamar hum ne banaya

insan ko insan magar hum ne banaya

ho koi musabbab magar asbab hamin hain

duniya ko ba-alfaz-e-digar hum ne banaya

parwaz-e-taKHayyul mein kabhi 'arsh se guzre

taron ko kabhi gard-e-safar hum ne banaya

duniya ki haqiqat to haqiqat mein nahin thi

shaista-e-arbab-e-nazar hum ne banaya

tinkon ko kiya jam' ba-andaz-e-nasheman

ye sho'bda-e-barq-o-sharar hum ne banaya

is gardish-e-kaunain ki buniyaad hamin hain

ye silsila-e-sham-o-sahar hum ne banaya

duniya mein rahe bhi to na rahne ke barabar

duniya ko faramosh-e-nazar hum ne banaya

ye jurat-e-ta'mir ghalat hum se hui thi

manzil pe nahin rah mein ghar hum ne banaya

ai 'josh' mohabbat to thi ek KHwab-e-musalsal

is KHwab ko ta'bir-e-asar hum ne banaya