ek hangama bapa hai dil-e-bimar ke bich

ek hangāma bapā hai dil-e-bīmār ke biich

zindagī qaid hai ummīd kī dīvār ke biich

ek ham haiñ ki ḳhasāre hī uThā.e ham ne

ek vo haiñ ki jo naf’e meñ haiñ hunkār ke biich

teġh munsif kī bhī pyāsī hai lahū kī mere

maiñ to mujrim huuñ khaḌā huuñ tire darbār ke biich

ab koī ḳhvāb dhaḌaktā hī nahīñ hai is meñ

barf jamne lagī insān ke pindār ke biich

sirf tārīḳh kī jildoñ meñ nahīñ likkhā hai

ek maqtal hai chhupā vaqt kī raftār ke biich

raushnī māñgne nikle the jo is bastī se

ab vo ḳhud jalte haiñ is shahr-e-siyah-kār ke biich

ḳhaak uḌtī hai jahāñ ḳhvāb sajā karte the

vahshateñ raqs meñ haiñ ab ke shab-e-tār ke biich

apnī miTTī kī hayā bech ke paayā hai jo

tauq ban kar vo giregā tire pindār ke biich

sirf nezoñ pe hī sachchā.ī nahīñ raushan hai

sach to maqtal meñ bhī chamkā hai shab-e-tār ke biich

ab ke munsif bhī gavāhoñ kī safoñ meñ hai khaḌā

jaane kyā 'adl huā hai tire darbār ke biich

haq kī āvāz uThānā hī muqaddar hai 'asad'

ḳhvāh sar jaa.e yahāñ maqtal-o-bāzār ke biich

dekhnā mo'jiza-e-'ishq-o-junūñ ab ke 'asad'

phir koī kalma paḌhegā rasan-o-dār ke biich

ek hangama bapa hai dil-e-bimar ke bich

zindagi qaid hai ummid ki diwar ke bich

ek hum hain ki KHasare hi uThae hum ne

ek wo hain ki jo naf’e mein hain hunkar ke bich

tegh munsif ki bhi pyasi hai lahu ki mere

main to mujrim hun khaDa hun tere darbar ke bich

ab koi KHwab dhaDakta hi nahin hai is mein

barf jamne lagi insan ke pindar ke bich

sirf tariKH ki jildon mein nahin likkha hai

ek maqtal hai chhupa waqt ki raftar ke bich

raushni mangne nikle the jo is basti se

ab wo KHud jalte hain is shahr-e-siyah-kar ke bich

KHak uDti hai jahan KHwab saja karte the

wahshaten raqs mein hain ab ke shab-e-tar ke bich

apni miTTi ki haya bech ke paya hai jo

tauq ban kar wo girega tere pindar ke bich

sirf nezon pe hi sachchai nahin raushan hai

sach to maqtal mein bhi chamka hai shab-e-tar ke bich

ab ke munsif bhi gawahon ki safon mein hai khaDa

jaane kya 'adl hua hai tere darbar ke bich

haq ki aawaz uThana hi muqaddar hai 'asad'

KHwah sar jae yahan maqtal-o-bazar ke bich

dekhna mo'jiza-e-'ishq-o-junun ab ke 'asad'

phir koi kalma paDhega rasan-o-dar ke bich