sar-e-rah ab na yun mujhko pukaro tum hi aa jao

sar-e-rah ab na yuuñ mujh ko pukāro tum hī aa jaao

zarā zahmat to hogī rāz-dāro tum hī aa jaao

kahīñ aisā na ho dam toḌ deñ hasrat se dīvāne

qafas tak un se milne ko bahāro tum hī aa jaao

bharosā kyā safīne kā ka.ī tūfān haa.il haiñ

hamārī nā-ḳhudā.ī ko kināro tum hī aa jaao

abhī tak vo nahīñ aa.e yaqīnan raat baaqī hai

hamārī ġham-gusārī ko sitāro tum hī aa jaao

'shakeb'-e-ġham-zada ko dard se hai ab kahāñ fursat

agar kuchh vaqt mil jaa.e to pyāro tum hī aa jaao

sar-e-rah ab na yun mujh ko pukaro tum hi aa jao

zara zahmat to hogi raaz-daro tum hi aa jao

kahin aisa na ho dam toD den hasrat se diwane

qafas tak un se milne ko bahaaro tum hi aa jao

bharosa kya safine ka kai tufan hail hain

hamari na-KHudai ko kinaro tum hi aa jao

abhi tak wo nahin aae yaqinan raat baqi hai

hamari gham-gusari ko sitaro tum hi aa jao

'shakeb'-e-gham-zada ko dard se hai ab kahan fursat

agar kuchh waqt mil jae to pyaro tum hi aa jao