main jahan tumko bulata hun wahan tak aao

maiñ jahāñ tum ko bulātā huuñ vahāñ tak aao

merī nazroñ se guzar kar dil-o-jāñ tak aao

phir ye dekho ki zamāne kī havā hai kaisī

saath mere mire firdaus-e-javāñ tak aao

hausla ho to uḌo mere tasavvur kī tarah

merī taḳh.īl ke gulzār-e-jināñ tak aao

teġh kī tarah chalo chhoḌ ke āġhosh-e-niyām

tiir kī tarah se āġhosh-e-kamāñ tak aao

phuul ke gird phiro baaġh meñ mānind-e-nasīm

misl-e-parvāna kisī sham-e-tapāñ tak aao

lo vo sadiyoñ ke jahannam kī hadeñ ḳhatm huiiñ

ab hai firdaus hī firdaus jahāñ tak aao

chhoḌ kar vahm-o-gumāñ husn-e-yaqīñ tak pahuñcho

par yaqīñ se bhī kabhī vahm-o-gumāñ tak aao

isī duniyā meñ dikhā deñ tumheñ jannat kī bahār

shaiḳh-jī tum bhī zarā kū-e-butāñ tak aao

main jahan tum ko bulata hun wahan tak aao

meri nazron se guzar kar dil-o-jaan tak aao

phir ye dekho ki zamane ki hawa hai kaisi

sath mere mere firdaus-e-jawan tak aao

hausla ho to uDo mere tasawwur ki tarah

meri taKHil ke gulzar-e-jinan tak aao

tegh ki tarah chalo chhoD ke aaghosh-e-niyam

tir ki tarah se aaghosh-e-kaman tak aao

phul ke gird phiro bagh mein manind-e-nasim

misl-e-parwana kisi sham-e-tapan tak aao

lo wo sadiyon ke jahannam ki haden KHatm huin

ab hai firdaus hi firdaus jahan tak aao

chhoD kar wahm-o-guman husn-e-yaqin tak pahuncho

par yaqin se bhi kabhi wahm-o-guman tak aao

isi duniya mein dikha den tumhein jannat ki bahaar

shaiKH-ji tum bhi zara ku-e-butan tak aao