faqr-o-faqa ranj-o-gham aur shad-mani ke usul

faqr-o-fāqa ranj-o-ġham aur shād-mānī ke usuul

'ilm ne ham ko sikhā.e zindagānī ke usuul

haal kuchh bhī ho na.ī shāḳheñ qalam karte nahīñ

bāġhbāno ham se sīkho bāġhbānī ke usuul

us ke lahje meñ 'ajab ik rang-e-dil-āvez hai

jāntā hai kis qadar vo hukmrānī ke usuul

sab usūl-o-zābte tāqat pe hī mauqūf haiñ

bhuul jāoge buḌhāpe meñ javānī ke usuul

dars-e-'ibrat de gayā hai ik bharosa 'umr meñ

dast-basta rah gaye saare kahānī ke usuul

'umr bhar kī dūriyāñ aur hijrateñ manzūr kiiñ

kitne mustahkam banā.e 'umr-e-fānī ke usuul

yaar 'az.har' tum javāñ ho to javāñ bāteñ karo

kyuuñ buḌhāpe se mushābah haiñ javānī ke usuul

faqr-o-faqa ranj-o-gham aur shad-mani ke usul

'ilm ne hum ko sikhae zindagani ke usul

haal kuchh bhi ho nai shaKHen qalam karte nahin

baghbano hum se sikho baghbani ke usul

us ke lahje mein 'ajab ek rang-e-dil-awez hai

jaanta hai kis qadar wo hukmrani ke usul

sab usul-o-zabte taqat pe hi mauquf hain

bhul jaoge buDhape mein jawani ke usul

dars-e-'ibrat de gaya hai ek bharosa 'umr mein

dast-basta rah gaye sare kahani ke usul

'umr bhar ki duriyan aur hijraten manzur kin

kitne mustahkam banae 'umr-e-fani ke usul

yar 'azhar' tum jawan ho to jawan baaten karo

kyun buDhape se mushabah hain jawani ke usul